Ás veces

Ás veces

Ás veces

busco saciar de inmensidade a sede

bebendo a auga dunha poza sucia,

mollando o beizo en tremedal lameiro

mentres a choiva raia a miña fiestra,

mentres a choiva peta no tellado

estrepitosamente refrescante.

Ás veces

síntome un astronauta doutro cosmos

abandonado no terrestre ermo,

alleo aos homes e as súas penas,

alleo á cantilena que pregoan,

mentres escoito acordes doutra música,

unha música feita ao meu xeito.

Outras veces, as máis,

sométome ao vaivén do mar, das ondas,

ao caprichoso azar do vendaval

que destrúe os cultivos impasible...

Cansado de vogar en mar agreste,

cansado de loitar contra o deserto,

alóxome no máis fértil xardín

e, moitas veces,

marabilloso edén dos meus amores.

Antonio Pinedo

(Grupo Poético Brétema)