CALIDOSCOPIO
Eran ás de bolboretas
que de cores irisaban
os agros e as campías
e as meixelas das rapazas.
Eran fachos rebrincando
pola terra e as montañas,
eran noites de San Xoán
de feitizos e de maxias.
Eran estrelas acendidas
que azuis pestanexaban,
eran engados de ollos
que de lonxe namoraban.
Eran bruxas convertidas
en fadas que encantaban,
eran beizos excitantes
de mociñas que bicaban.
Eran voces de cristal
e murmurios que chamaban,
eran cantos de sereas
que o siso che roubaban.
Eran ollos bivalvos
que viñan polas praias:
San Francisco, A Lagoa, Espiñeiro,
Mendiño, Rodeira ou Moaña,
e se tentabas collelos
polas ondas te levaban.
Eran ollos glaucos
que rubían polas augas,
e se mirabas neles
confundíanche a mirada.
Eran ollos que eu mirei,
eran ollos que miraban,
eran ollos que aínda miran
polos ollos que aínda aman.
Serxio López Corona + 2009
Grupo Poético Brétema
No hay comentarios:
Publicar un comentario
" Piensa si lo que vas a decir es más hermoso que el silencio"