Música es ti
Pétalos multicolores
percorren un teclado
de nácara e acibeche,
soan brétemas
como semicorcheas fuxidías,
ábrese o ceo
con brancas
tocadas polas raiolas
dun sol outonal
que arrecende a follas
secas e pisadas
na fraga.
Soa un si bemol
como terra húmida
chea de landras
como semifusas
espalladas nun pentagrama
interpretadas por un merliño
que venta neste serán
unha treboada
composta por Vivaldi
no seu Outono eternal,
atroan os baixos beethonianos,
albíscase o sol na calma,
mentres o río de Smetana
baixa paseniño e maxestuoso,
un ouriol alegra
cos seus rechouchíos
o teatro da fraga.
Entre mentres prepárase un coro
desafinado de corvos
que son os teloneros
do coro de escravos
dun Verdi radiante
de ledicia
pola estrea dun outono musical
cheo dos acordes
dunha Natureza
xenerosa, espléndida,
cunha voz límpida,
branca e serea.
Nun curruncho
do bosque, un sátiro
asexa a unha garrida ninfa
que liba acompañada de Baco
o néctar dun acio
recén recollido
dunha cepa albariña
desta fermosa e farturenta
terra do Salnés.
Ao mesmo tempo,
escoito
o concerto fermoso de Gaia
e nun ángulo escuro do xardín
miro abraiado para ti.
Outono 2008, Xermán Torres
No hay comentarios:
Publicar un comentario
" Piensa si lo que vas a decir es más hermoso que el silencio"